Tampoꞌ Behóá ia miꞌi romboloꞌ lembo to maeláꞌ i Poropensi Sulawesi Tangaꞌ, Kabupaten Pohoꞌ, Kecamatan Behóá. I lalu kecamatan itu, ara uwalu wánuá, ia miꞌi tálu wánuá i Kakau (Rompo, Katu, Torire), hai lima wánuá i Ngamba (Doda, Bariri, Hanggira, Lempe, Baleura). Dodaꞌ ia miꞌi pehodaꞌána topopárentá Kecamatan Behóá. Tampoꞌ Behóá raisá tauna láwiꞌ handaꞌ situs megalit ionoꞌ.
Rawa i tampoꞌ Behóá tiꞌara gaga meamuꞌ láwiꞌ kaiwongkona hangko i tahiꞌ, rekeꞌ-rekeꞌna uwalu átuna mete.
Tauna to toroꞌ i Behóá deꞌe-deꞌe rekeꞌ-rekeꞌna hampuloꞌ hai rosabu (12.000). Ara woꞌo to melimbá karaoꞌ hai toroꞌ i Palu, i Pohoꞌ, i Manadoꞌ, i Jakarta, i Irian Jaya hai i katoroꞌá ntániꞌna.
Behóá ia miꞌi katoroꞌá to meawaꞌ. Tampoꞌna maeláꞌ hai maruduꞌ, onoꞌ miꞌi haneꞌi kahandaꞌána toBehóá mobondeheꞌ. Ara woꞌo to mohinoe, hai handaꞌ wuaꞌna powiáꞌraꞌ nodo goaꞌ, coklat, tamate, marisaꞌ, katedoꞌ, hai tudaꞌ-tudaꞌ ntániꞌna.
Hangkoia, hangko tiꞌara mani toBehóá moisá kaheánána Pueꞌ Ala, kahandaꞌána toBehóá topoánitu. Agáiáná lábi hangatu parena to liu, haweꞌ miꞌi hadua toBelanda to rahangaꞌ Weseldik hingkakani hai misi-misi hangko i Manadoꞌ (sending). Moántiheꞌ Ngkóráꞌ Marasa mokana i Iesu Topohómpóꞌ Salaꞌ. Marue-rue toBehóá mokábáhá ánituraꞌ, hai topoánitu to kahópóꞌána rariu pare 1956. Rauliꞌ tauna, danggona tobaleilo iti bulá miꞌi tempóna rariu. Deꞌe-deꞌe upu-upu wánuá i Behóá ara miꞌi pamingguá, kahandaꞌána Gereja Kristen Sulawesi Tengah (GKST). Ara woꞌo jemaꞌa Pentakosta hai Katolik.
ToBehóá motibaaꞌ mani ádáraꞌ, rápáꞌna ádá pohamboko, ádá pepomahile ane modupaꞌ torare to mapángkáꞌ lántiꞌna, ádá ane ánángkóiꞌ hangko mesupaꞌ, ane ara to mate. Ara woꞌo bahangapa ádá to tiꞌara piꞌi rapeuláꞌi láwiꞌ mentóáꞌ hangko i ádá topoánitu, rápáꞌna ádá mantudaꞌ pare.
Tongawaꞌ ntepuꞌu, haweꞌ deꞌe-deꞌe, pohintuwuꞌraꞌ toBehóá maróhó mani. Rápáꞌna, ane arai to mepálehi, ba to ratauna, upu-upu tauna medurei mompaihó, mekau, motenda, hai hinángkáꞌna. Mohintuwuꞌheꞌ woꞌo hai tauna to toroꞌ i tampoꞌraꞌ to tiꞌara toBehóá.
Kiuliꞌ handaꞌ kamaroꞌana i Pueꞌ Ala to bulá laluNa mampoweꞌi toBehóá tampoꞌ to meawaꞌ hai maruduꞌ rakatoroꞌi. Hai deꞌe-deꞌe toBehóá molámbiꞌ miꞌi pewátiꞌ to mahile hangko i Pueꞌ, láwiꞌ peisámoheꞌ mobásá hai mampehádingi Ngkóráꞌna Pueꞌ i lala básáraꞌ haduduáraꞌ. Ara woꞌo filem Iesu i lalu básáraꞌ haduduáraꞌ.
